Formenn funda um Icesave

Formenn flokkanna munu funda um stöðuna í Icesave málinu klukkan tíu. Fundur fjárlaganefndar sem hófst klukkan rúmlega átta stendur enn yfir. Birgitta Jónsdóttir, þingmaður Hreyfingarinnar, segir að staðan sem sé komin upp sé afar alvarleg.

Þriðju umræðu um Icesave frumvarpið var frestað rétt fyrir miðnætti í gær en þá voru níu þingmenn enn á mælendaskrá. Ástæða frestunarinnar var að nýjar upplýsingar bárust frá bresku lögmannsstofunni Mishcon de Reya sem stjórnarandstæðingar segja benda til þess að tilteknum upplýsingum hafi verið haldið leyndum fyrir þingmönnum. Því vísuðu Steingrímur J. Sigfússon, fjármálaráðherra, og Guðbjartur Hannesson, formaður fjárlaganefndar, á bug í umræðum á Alþingi í gær.

Þá spyrja þingmenn stjórnarandstöðunnar hvers vegna gögnin séu að koma fram núna. Þeir spyrja jafnframt hvort formaður samninganefndarinnar, Svavar Gestsson, hafi einn haft aðgang að þessum upplýsingum eða hvort ráðherrar úr ríkisstjórninni hafi einnig haft aðgang að þeim.

„Þetta er ótrúlegt. Það er mjög alvarlegt að leyna ráðherra upplýsingum eins og þessum," segir Birgitta. Hún vill lítið segja um framhaldið en vonast til þess að málið fari ekki í hnút.

Þingfundur hefst klukkan hálf ellefu en til stóð að kosið yrði um Icesave frumvarpið í dag. Framhaldið skýrist væntanlega á fundi formanna flokkanna.