Vill reglur um sjósund

„Það er verið að taka um að setja Ermasundsreglur. Það er krafa sumra. En það eru allir sammála um að það verði að setja skýrar reglur," segir sjósundkappinn Benedikt Lafleur um öryggi sjósundkappa en íþróttinn nýtur sívaxandi vinsælda hér á landi.

Benedikt komst sjálfur í hann krappann um helgina þegar fylgdarlið hans missti sjónar á honum þegar hann synti Grettissundið nálægt Drangey. Þá hringdu þeir í lögregluna á Sauðárkróki sem aftur hringdi í Landsbjörgu og björgunarsveitir voru kallaðar út. Aðstoðin var svo afturkölluð fimmtán mínútum síðar.

Atvikið, auk sívaxandi vinsælda sjósundsins, hafa orðið til þess að sjósundkappar skeggræða öryggisreglur varðandi sjósund og hvort slíkt þurfi yfirhöfuð.

Sjálfur er Benedikt hlynntur því að settar verði einfaldar reglur sem taki mið af aðstæðum. Hann segir Ermasundsreglurnar stundum og flóknar. Þá eigi þær oft ekki við íslenskar aðstæður.

Í þeim reglum er til að mynda kveðið á um að ef menn ætli að synda í sjónum þá þurfi bátur að fylgja sundmanninum. Benedikt bendir á að það sé sennilega óraunhæft að bátur elti hvern sundmann, raunhæfara sé að slöngubátur fylgi tveimur þremur að mati Benedikts.

„Svo er deilt um þessa búninga," segir Benedikt en í Ermasundsreglunum er hart tekist á um skálmsíddir blautbúninga. Þá vilja sumir meina að það sé ekki gilt sjósund syndi menn í blautbúningum.

Benedikt segir að slíkir búningar geti verið öflugt öryggisatriði í íslenskum sjó. Hann vill ekki gera minna úr afrekum þeirra sem synda í búningum.

Hann segir umræðuna um öryggi sjósundkappa ekki vera komna í formlegt ferli. Hann vilji fá hana upp á yfirborðið þannig hægt sé að ræða málið af festu og þannig að hægt sé að koma saman einhverjum reglum um sjósundið.

Sjálfur er hann tilbúinn að leggja sitt af mörkum: „Ég er tilbúinn að sætta ólík sjónarmið þeirra sem vilja herða reglur og svo hinna sem vilja einfaldar grunnreglur sem taka mið af aðstæðunum," segir Benedikt að lokum.