Abidal er sjötti maðurinn sem framlengir hjá Barca í vetur

Eric Abidal er sjötti leikmaður Barcelona á þessu tímabili sem framlengir samning sinn við liðið en hann framlengdi í dag samninginn sinn um eitt ár og verður Frakkinn því á Nývangi til ársins 2012.

Abidal er 30 ára vinstri bakvörður sem hefur spilað 91 leik með Barcelona síðan að hann kom til liðsins frá Lyon fyrir 2007-2008 tímabilið. Hann hefur einnig leikið með Lille og Mónakó á ferlinum.

Það verður einnig erfiðara að kaupa Abidal eftir að nýi samningurinn var undirritaður því nú er aðeins hægt að kaupa upp samning hans séu menn tilbúnir að greiða 90 milljónir evra sem eru tæplega 16,6 milljarðar íslenskra króna.

Victor Valdes, Pedro, Carles Puyol, Lionel Messi og Yaya Toure hafa allir framlengt samninga sína við Barcelona-liðið í vetur.