Vonumst til að ráða þjálfara í dag

Ótthar Edvardsson, framkvæmdarstjóri Vals, segir það óskandi að félagið muni ganga frá ráðningu nýs þjálfara meistaraflokks karla í dag.

Guðmundur Benediktsson, leikmaður KR og fyrrum leikmaður Vals, hefur verið sterklega orðaður við þjálfarastöðuna. Ótthar vildi þó ekki staðfesta að félagið ætti í viðræðum við hann, né hverjir væru á óskalista þeirra.

Ótthar vildi enn fremur ekki tjá sig um ástæður þess að Willum Þór Þórsson hætti hjá félaginu.

Hann sagðist þó vonast til þess að þessi mál myndu leysast fljótt. „Vonandi ráðum við þjálfara sem allra fyrst. Jafnvel í dag. Við viljum þó allra helst að það verði nýr þjálfari tekinn við fyrir næsta leik sem er gegn KA í bikarnum á mánudaginn."