Grétar: Okkar lélegasti leikur í sumar

Grétar Sigfinnur Sigurðarson, leikmaður KR, segir að frammistaða sinna manna gegn Fram í dag hafi án nokkurs vafa verið sú lélegasta í sumar til þessa.

Fram vann í dag 3-0 sigur á KR í fyrsta leik áttundu umferðar Pepsi-deildarinnar en leikurinn fór fram á Laugardalsvellinum.

„Fyrri hálfleikurinn var fínn hvað varnarleikinn okkar varðar," sagði Grétar en öll mörk Fram komu í síðari hálfleik. „En svo töpuðum við þessu á varnarleiknum. Við vorum allt of langt frá mönnunum okkar og fengum á okkur tvö aulamörk. Það hefði ekki átt að gerast og það drap okkur. Þeir voru bara sterkari."

„En annars sköpuðum við okkur ekki færi og þeir kláruðu einfaldlega leikinn."

Hann segir að KR-ingar séu með miklu betra lið en þeir sýndu í kvöld. „Svona leikir eiga ekki heima hjá liði sem ætlar sér að vera í toppbaráttu. Þetta gæti reynst okkur mjög dýrkeypt lexía."