Catalina Mikue Ncogo réð burðardýr til þess að flytja næstum 400 grömm af kókaíni frá Amsterdam til Íslands í gegnum blaðaauglýsingu. Þetta fullyrti annað burðardýrið við aðalmeðferð málsins í Héraðsdómi Reykjaness í gær. Vísir hefur áður greint frá málinu, en burðardýrin, sem voru tvær belgískar konur, 26 og 31 árs gamlar voru báðar dæmdar í tíu mánaða fangelsi fyrir smyglið. Þær voru handteknar í Leifsstöð við komuna til landsins þann 12 apríl síðastliðinn.

Konurnar báru báðar vitni fyrir dómi í dag í máli sem höfðað hefur verið gegn Catalinu vegna smyglsins. Þær sögðust hafa sótt um starf í gegnum atvinnuauglýsingu sem birtist í blöðum. Þegar þær hafi sett sig í samband við aðila sem stóðu að auglýsingunni hefði þeim verið gert ljóst að starfið fælist í því að flytja hátt í 400 grömm af kókaíni frá Amsterdam til Íslands. Þeim hefði verið boðin greiðsla að andvirði 10 þúsund evrur fyrir vinnuna en auk þess yrði flugferðin og hótelgistingin greidd fyrir þær.

Yngri konan sagði að þær hefðu báðar viljað hætta við verkið þegar til kastanna kom og snúa frá Amsterdam heim til Belgíu. Það hefðu þær ekki getað gert því að Catalina og önnur kona sem stóð að skipulagi smyglsins með henni hefðu tekið af þeim persónuskilríki þeirra og fylgst vandlega með því að þær færu um borð í flugvél til Íslands.

Eldri konan vildi ekki staðfesta að það væri Catalina sem hefði skipulagt smyglið, né nefna önnur nöfn. Sagðist hún vera flogaveik og það gerði henni erfitt fyrir að muna andlit. Yngri konan fullyrti hins vegar að Catalina hefið skipulagt smyglið en sagðist ekki vita hvaða kona það hefði verið sem stóð að skipulagningunni með henni.

Catalina Mikue Ncogo hefur einnig verið grunuð um mansal og að hafa rekið vændisþjónustu á Hverfisgötu. Það mál er enn í rannsókn hjá lögreglu.