Katla gæti vaknað

Jarðskjálftavirkni sem staðið hefur undir Eyjafjallajökli frá því í júníbyrjun er skýrð með því að þar sé glóandi kvika á hreyfingu. Hræringarnar nú er taldar minna á tvo atburði í jöklinum á síðasta áratug, árin 1994 og 1999. Þeir enduðu sem kvikuinnskot án þess að eldgos yrði. Páll Einarsson segir þó alls ekki hægt að útiloka að núna geti þetta endað sem eldgos þótt líklegra sé að þetta verði samskonar innskot og þá.

Páll segir greinilegt að Eyjafjallajökull og Katla séu tengd. Þessi systkin sitji hlið við hlið og hafi áhrif hvort á annað, þótt Katla sé miklu hættulegri. Sagan sýni að atburðir í Eyjafjallajökli geti ræst Kötlu, eins og gerðist árið 1999. Kvikuinnskoti í Eyjafjallajökli hafi þá, að því er virðist, einnig fylgt smágos í Kötlu í júlímánuði 1999. Þá hafi líklega orðið lítið gos undir jöklinum sem ekki náði upp á yfirborð en leiddi til hlaups í Jökulsá á Sólheimasandi sem nærri tók af brúna.