Ósammála um hvort fyrirvararnir kalli á nýja samninga

Formaður Sjálfstæðisflokksins segir að afgreiðsla fjárlaganefndar á Icesave frumvarpinu kalli á nýjar viðræður við Breta og Hollendinga. Forsætis- og fjármálaráðherra eru þessu ekki sammála en segja þó að auðvitað verði að útskýra fyrirvarana fyrir viðsemjendum Íslendinga.

Steingrímur J. Sigfússon, fjármálaráðherra, segist ánægður með að fjárlaganefnd hafi lokið afgreiðslu Icesave málsins. Steingrímur segist vona að það muni ganga vel að útskýra fyrirvarana fyrir Bretum og Hollendingum.

Samkomulagið ekki sett í uppnám

„Ég er ákaflega ánægð með að þetta samkomulag hafi náðst og að það sé svona breiður hópur þingmanna á bak við þetta. Það skiptir verulegu máli í framhaldinu þegar við ræðum við Hollendinga og Breta. Ég tel það sé nokkuð ljóst að við séum ekki að setja samninganna í neitt uppnám með þessari niðurstöðu," segir Jóhanna Sigurðardóttir, forsætisráðherra.

„Nei, ekki að mínu mati," segir Jóhanna aðspurð hvort þetta þýði nýjar viðræður við Breta og Hollendinga. Staðið hafi verið þannig að málum að ekki þurfi að koma til nýrra viðræðna.

Sáttur við breytingarnar

Bjarni Benediktsson, formaður Sjálfstæðisflokksins, segist eftir atvikum sáttur við þær breytingar sem verið sé að gera á frumvarpinu.

„Það má segja að fallist hafi verið á allar helstu kröfur sem fulltrúar Sjálfstæðisflokksins höfði uppi í nefndinni. Það skorti algjörlega að í þessa samninga væri settar einhverjar girðingar. Reyndar teljum við þetta það miklar breytingar á málinu í heild sinni að það kalli á nýjar viðræður," segir Bjarni.