Samkomulag í höfn

Frumvarp ríkisstjórnarinnar um ríkisábyrgð vegna Icesave samkomulagsins var afgreitt út úr fjárlaganefnd Alþingis klukkan tvö í nótt með stuðningi allra flokka nema Framsóknarflokks, líkt og greint var frá hér á Vísi í morgun.

Borgarahreyfingin mun skrifa upp á álit meirihluta nefndarinnar með stjórnarflokkunum en Sjálfstæðisflokkurinn mun skila séráliti en lýsir því yfir að hann styðji breytingatillögur meirihlutans, með þeim fyrirvara að ekki verði frekari breytingar á þeim í meðförum Alþingis. Framsóknarmenn styðja ekki breytingatillögurnar og skila séráliti.

Guðbjartur Hannesson, formaður fjárlaganefndar, segir að reynt hafi verið til þrautar að ná samkomulagi við Framsóknarmenn en það hafi ekki tekist. Í fyrirvörum meirihluta fjárlaganefndar við frumvarpið er hinu svo kallaða Brussel ákvæði haldið til haga, sem kveður á um að tekið skuli tillit til hinnar erfiðu og fordæmalausu stöðu Íslands.

Þá er fallið frá ákvæði um að greiðslur skuli miðast við 3,5% af landsframleiðslu, en þess í stað sett inn ákvæði um þak á greiðslur Íslands, þannig að ef engin aukning verði í landsframleiðslu og hagvöxtur aukist ekki, falli greiðslur niður á því tímabili.

Þá er fyrirvari varðandi ábyrgð ríkissjóðs á Tryggingasjóði innistæðueigenda, ákvæði sem kennt er við Ragnar Hall hæstaréttarlögmann. Það kveður á um að ef dómstólar komast að annarri niðurstöðu varðandi ábyrgð ríkissjóðs á Tryggingasjóðnum en gert er ráð fyrir í samkomulaginu, skuli niðurstaða dómstóla gilda. Nú er það svo í samningnum að kröfur Tryggingasjóðsins annars vegar og Breta og Hollendinga hins vegar eru metnar jafnar. Ragnar Hall vill hins vegar meina að krafan í eignir Landsbankans sé bara ein, þ.e.a.s. frá Tryggingasjóðnum og því eigi hún að njóta forgangs upp í lágmarksskyldur sjóðsins gagnvart innistæðueigendum.

Í áliti meirihlutans er endurskoðunarákvæði um eftirliti Alþingis með samningnum og fyrirvari frá Borgarahreyfingunni um að gengið verði eftir því að ná í eignir þeirra sem bera ábyrgð á hruninu.

Guðbjartur Hannesson telur að Bretar og Hollendingar ættu að geta unað við þessa fyrirvara. Í þeim sé tekið fram að rísi ágreiningur milli þjóðanna um framkvæmd samningsins skuli sest að samningaborði. Náist ekki niðurstaða þar sé það Alþingis að taka ákvörðun um það hvort ríkisábyrgð ríkissjóðs Íslands vegna samningsins falli niður.