Aftur kom Macheda United til bjargar

Ítalski unglingurinn Federico Macheda var hetja Manchester United annan deildarleikinn í röð í dag þegar hann tryggði liði sínu 2-1 útisigur á Sunderland með marki undir lokin.

Paul Scholes kom United yfir í leiknum með fallegu skallamarki en Kenwyne Jones jafnaði verðskuldað fyrir Sunderland í síðari hálfleik. Það kom því í hlut ofurvaramannsins Macheda að tryggja United dýrmæt þrjú stig, en hann potaði skoti Michael Carrick framhjá markverðinum um stundarfjórðungi fyrir leikslok. United er því aftur komið á toppinn og á leik til góða.

Chelsea komst í hann krappan á móti Bolton þar sem liðið náði 4-0 forystu í leiknum, en vann að lokum nauman 4-3 sigur eftir að hafa misst flugið algjörlega í síðari hálfleik.

Didier Drogba skoraði tvívegis fyrir Chelsea og þeir Frank Lampard og Michael Ballack sitt markið hvor.

Arsenal lenti undir 1-0 gegn Wigan en vann 4-1 útisigur. Theo Walcott skoraði sitt fyrsta mark fyrir Arsenal síðan í haust og þeir Silvestre, Arshavin og Billong eitt hver eftir að Mido hafði komið Wigan yfir.

Tottenham vann góðan 1-0 heimasigur á grönnum sínum í West Ham með marki frá Roman Pavlyuchenko og þá gerðu Portsmouth og West Brom 2-2 jafntefli. Loks vann Middlesbrough lífsnauðsynlegan 3-1 sigur á Hull í fallbaráttunni.