Auðvelt hjá Liverpool

Liverpool heldur áfram pressu á Manchester United í toppslagnum í ensku úrvalsdeildinni eftir auðveldan 4-0 sigur á Blackburn í fyrsta leik dagsins.

Liverpool menn minntust þess í dag að tuttugu ár eru liðin frá Hillsborough slysinu hræðilega og höfðu mínútu þögn fyrir leikinn. 

Fernando Torres var ekki lengi að kveikja í stuðningsmönnum Liverpool og skoraði stórkostlegt mark á fimmtu mínútu leiksins. Hann var svo aftur á ferðinni síðar í fyrri hálfleiknum og skallaði boltann í netið.

Blackburn lék ekki með eiginlegan framherjan í leiknum og mátti sín lítils gegn frískum heimamönnum. Varnarmaðurinn Daniel Agger þrumaði boltanum í netið af 30 metra færi undir lokin og varamaðurinn David Ngog potaði inn fjórða markinu rétt áður en flautað var af.

Liverpool er komið í 70 stig á toppi deildarinnar, en Manchester United er með 68 stig og á tvo leiki til góða - þann fyrri gegn Sunderland á útivelli klukkan 14 í dag.

Liverpool 4 - 0 Blackburn

Torres ´5, ´33, Agger ´83, N'Gog ´90