Bent biðst afsökunar á skrifum sínum

Framherjinn Darren Bent hjá Tottenham hefur beðið stjórnarformann félagsins Daniel Levy afsökunnar á niðrandi ummælum sem hann hafði um hann á Twitter-síðu sinni.

Þar lét Bent í ljósi óánægju sína með að hann hafi ekki fengið að fara til Sunderland á 15 milljónir punda eftir að Hull og Stoke sýndu leikmanninum áhuga.

Levy var þá talinn vilja fá hærri upphæð fyrir Bent en leikmaðurinn lét þá í ljós óánægju sína og biðst velvirðingar á því.

„Ég geri mér grein fyrir því að félagsskipti ganga sjaldan smurt fyrir sig og ég játa það að ég missti bara stjórn á mér yfir því hvað hlutirnir gengu hægt fyrir sig. Það sem ég sagði var óviðeigandi og ég biðst afsökunar á skrifum mínum," segir Bent í viðtali á opinberri heimasíðu Tottenham.