Umfjöllun: Þróttarar lágu í Keflavík

Keflvíkingar unnu 3-2 sigur á Þrótturum í Keflavík í kvöld þar sem þrjú af mörkunum komu á síðustu fjórum mínútum leiksins. Keflvíkingar fóru þar með upp í 5.sæti deildarinnar með 17 stig en Þróttarar sitja áfram í fallsæti og eru með 5 stig eftir 9 leiki.

Liðin höfðu frekar hægt um sig í fyrri hálfleik. Þrátt fyrir að hafa tapað 4-0 fyrir FH í síðasta leik þá lögðust Þróttarar ekki í vörn og mættu heimamönnum framarlega á vellinum. Það skilaði sér ágætlega því Þróttarar voru síst lakara liðið í hálfleiknum og fengu besta færi hans þegar Hjörtur Júlíus Hjartarson slapp einn í gegnum vörn heimamanna en Lasse Jörgensen í markinu varði vel skot Hjartar.

Keflvíkingar áttu líka sínar sóknir og mesta hættan skapaðist þegar Magnús Þórir Matthíasson átti gott skot úr teignum eftir sendingu Harðar Sveinssonar. Sindri í markinu varði hins vegar glæsilega og því markalaust þegar liðin gengu til búningsherbergja.

Síðari hálfleikurinn var hins vegar öllu fjörugri. Keflvíkingar skoruðu strax á þriðju mínútu hálfleiksins þegar Stefán Örn Arnarson, sem kom inn sem varamaður í fyrri hálfleik þegar Símun Samuelsen meiddist, kláraði færi sitt afar fagmannlega eftir góða sókn heimamanna.

Eftir þetta færðu Þróttarar sig framar og áttu færi, það besta þegar Lasse Jörgensen varði stórkostlega skalla frá Hauki Páli Sigurðssyni. Það voru hins vegar heimamenn sem skoruðu annað mark leiksins og það kom úr vítaspyrnu sem Haukur Ingi fékk eftir að hafa verið felldur af Sindra Snæ í markinu. Hárréttur dómur og Magnús Þorsteinsson skoraði af miklu öryggi úr vítapsyrnunni.

Þróttarar lögðu allt kapp á að minnka muninn og Andrés Vilhjálmsson klúðraði algjöru dauðafæri áður en Magnús Már Lúðvíksson skoraði úr annarri vítaspyrnu leiksins, en hún var dæmd eftir að Alan Sutej fékk boltann í höndina í vítateig Keflavíkur.

Örskömmu síðar bætti Hörður Sveinsson við þriðja marki Keflavíkur eftir að hafa sloppið í gegnum vörn Þróttar en Hörður var grunsamlega langt fyrir innan vörnina þegar hann fékk boltann. Þróttarar áttu svo síðasta orðið þegar Andrés Vilhjálmsson minnkaði muninn í 3-2 skömmu áður en Þorvaldur Árnason flautaði til leiksloka.

Fremur sanngjarn sigur Keflavíkur í höfn og þeir komnir í 5.sæti deildarinnar, uppfyrir Fylkismenn, en Þróttarar sitja eins og áður segir í fallsæti.

Keflavík - Þróttur 2-1

1-0 Stefán Örn Arnarson (48.mín)

2-0 Magnús S. Þorsteinsson (70.mín)

2-1 Magnús Már Lúðvíksson (87.mín)

3-1 Hörður Sveinsson (89.mín)

3-2 Andrés Vilhjálmsson (90.mín)

Áhorfendur: 727

Dómari: Þorvaldur Árnason

Skot (á mark): 11 - 11 (5 - 8)

Varin skot: Lasse 6 - Sindri 2

Horn: 3 -5

Aukaspyrnur fengna: 8 -12

Rangstöður: 2 - 4

Keflavík (4-4-2)

Lasse Jörgensen 7 - Maður leiksins

Guðjón Árni Antoníusson 7

Bjarni Hólm Aðalsteinsson 6

Alan Sutej 6

Brynjar Örn Guðmundsson 6

Magnús Sverrir Þorsteinsson 7

Einar Orri Einarsson 5

Símun Samuelsen 5

(34 Stefán Örn Arnarson 6)

Bessi Víðisson 4

(45 Haukur Ingi Guðnason 6)

Hörður Sveinsson 6

Magnús Þórir Matthíasson 5

(68 Viktor Guðnason 5)

Þróttur (4-5-1)

Sindri Snær Jensson 6

Jón Ragnar Jónsson 6

Kristján Ómar Björnsson 5

Haukur Páll Sigurðsson 6

Birkir Pálsson 4

Magnús Már Lúðvíksson 7

Hallur Hallsson 4

(75 Andrés Vilhjálmsson -)

Dennis Danry 5

Rafn Andri Haraldsson 5

Morten Smidt 6

(63 Davíð Þór Rúnarsson 5)

Hjörtur Júlíus Hjartarson 4

(75 Trausti Eiríksson -)