Vill funda um 40% hækkun á dreifingakostnaði raforku

Jón Bjarnason, þingmaður VG í norðvesturkjördæmi, hefur sent fjárlaganefnd bréf og farið fram á fund í nefndinni til að ræða allt að 40% hækkun á dreifingarkostnaði raforku til neytenda frá 1. janúar 2009. Hann segir að þessi gríðarlega hækkun hafi ekki verið kynnt við umræður afgreiðslu fjárlaga fyrir nokkrum dögum síðan.

Jón fer fram á að hækkunin komi ekki til framkvæmda fyrr en Alþingi hefur fjallað um málið í fjárlaga- og iðnaðarnefnd. Hann segir að hækkunin komi til viðbótar því að framlög til jöfnunar orkuverðs í strjálbýli hafi skerst að raungildi á undanförnum árum, auk þess sem niðurgreiðsla til rafhitunar á svokölluðum köldum svæðum hafi verið skornar niður um 200 milljónir króna á fjárlögum fyrir árið 2009. Samtals geti því verið um að ræða um tuga prósenta hækkun á rafmagnskostnaði heimila, einkum til sveita.

Jón minnir á að RARIK sé þjónustustofnun í 100% eigu ríkisins en ríkisstjórnin hafi hvatt til þess að verðskrárhækkunum verði haldið í lágmarki til að vinna gegn verðbólgu.