Fjórir leikir í Pepsi-deild karla í kvöld

Sjöunda umferð Pepsi-deildar karla heldur áfram í kvöld með fjórum hörku leikjum.

Íslandsmeistarar FH heimsækja Grindvíkinga en FH-ingar hafa unnið fimm leiki í röð eftir tap í fyrstu umferðinni. Grindvíkingar hafa aftur á móti einungis unnið einn leik í deildinni í sumar.

KR og Keflavík mætast í Frostaskjólinu en bæði félögin eru með ellefu stig í fjórð og fimmta sæti og sigurliðið getur því blandað sér í toppbaráttuna.

Spútniklið Stjörnunnar fær Fram í heimsókn á gervigrasið í Garðabæ en Framarar hafa ekki náð sömu hæðum og síðasta sumar og hafa ekki unnið leik síðan í fyrstu umferðinni. Stjarnan er hins vegar í þriðja sæti og hefur unnið fjóra af sex leikjum sínum til þessa, árangur sem fæstir áttu von á þegar Íslandsmótið hófst.

Þá vonast Þróttarar til þess að ná sínum fyrsta sigri í deildinni í sumar þegar Eyjapeyjar í ÍBV koma í heimsókn en Þróttur er eina lið deildarinnar sem er án sigurs. ÍBV getur með sigri slitið sig örlítið frá botnbaráttunni og komist um miðja deild.

Leikir kvöldsins:

Grindavík - FH Grindavíkurvöllur kl. 19.15

KR - Keflavík KR-völlur kl. 19.15

Stjarnan - Fram Stjörnuvöllur kl. 19.15

Þróttur R. - ÍBV Valbjarnarvöllur kl. 20