Tvö skip gætu skýrt olíubrák á Faxaflóa

Lýsing staðhátta þar sem eftirlitsflugvél Landhelgis-gæslunnar fann olíubrák á dögunum gæti bent til þess að annað skip en bandaríska varðskipið USCGC Alexander Hamilton liggi þar á hafsbotni, eins og greint var frá í fjölmiðlum í gær. Hugsanlegt er að í hlut eigi annað skip sem þýskur kafbátur sökkti á stríðsárunum, að mati Gæslunnar.

Talið er að lýsingin geti einnig átt við um breska olíuskipið Shirvan sem þann 10. nóvember 1944 varð fyrir sprengjuárás þýska kafbátsins U-300.

Shirvan var 6.017 tonna olíuskip, með 8.050 tonn af gasolíu innanborðs en skipið var á leið í Hvalfjörð. Tundurskeyti þýska kafbátsins hitti Shirvan og varð skipið samstundis alelda. Farþegaskipið Goðafoss sigldi til bjargar og tókst að bjarga öllum þeim nítján sem voru í áhöfn Shirvan en nokkrir þeirra hlutu alvarleg brunasár. Goðafoss sigldi á fullri ferð til Reykjavíkur en aðeins klukkustund síðar varð Goðafoss einnig fyrir tundurskeyti frá þýska kafbátnum. Fórust fjölmargir við árásina eða fjórtán úr áhöfn Goðafoss og tíu farþegar, þar á meðal tvö börn. Einnig fórust allir nítján skipverjar Shirvan.

Staðsetning olíunnar á Faxaflóa passar við þann punkt þar sem talið er að Shirvan hafi sokkið og passar stærðin á skipinu einnig við mælingar sjómælingabátsins Baldurs frá síðastliðinni viku sem þóttu sterklega benda til að þar lægi bandaríska varðskipið.