Fimmti maðurinn handtekinn í tengslum við Íbúðalánasjóðssvindlið

Fimmti maðurinn hefur verið handtekinn í tengslum við tugmilljóna króna Íbúðalánasjóðssvindlið sem uppgötvaðist fyrr í sumar. Sex hundruð og fimmtíu þúsund krónur fundust við húsleit efnahagsbrotadeildar ríkislögreglustjóra hjá honum og pappírsgögn sem talin eru bendla hann við málið.

Maðurinn er í kringum þrítugt og gerði efnahagsbrotadeild ríkislögreglustjóra húsleit hjá honum í fyrradag. Hann var handtekinn í kjölfarið og sleppt eftir sólarhring, að loknum yfirheyrslum. Maðurinn er grunaður um að hafa komið að skipulagningu svikanna og er sá fimmti sem handtekinn er vegna málsins en hinir fjórir sem eru á tvítugs- og þrítugsaldri hefur nýlega verið sleppt úr gæsluvarðahaldi.

Í húsakynnum hans fundust pappírar og önnur gögn sem talin eru bendla hann við málið. Auk þess fundust 650 þúsund krónur í seðlum á heimili hans sem lögreglan lagði hald á. Mennirnir eru grunaðir um að hafa komið sér inn í stjórn tveggja félaga fyrr í sumar, selt tvær eignir í eigu þeirra með fölsuðum kaupsamningum og svikið út 40 milljónir króna út úr íbúðalánasjóði með nöfnum saklausra einstaklinga að því er virðist. Helgi Magnús Gunnarsson saksóknari efnahagsbrotadeildar segir rannsókn málsins miða vel.