Umfjöllun: Fjörugt jafntefli hjá Val og Keflavík á Vodafonevellinum

Valur og Keflavík gerðu 2-2 jafntefli i fjörugum og skemmtilegum leik á Vodafonevellinum í kvöld. Sóknarleikur var ráðandi í leiknum og bæði lið buðu áhorfendum upp á hina bestu skemmtu.

Leikurinn byrjaði mjög fjörlega og Guðmundur Steinarsson átti gott skot strax á fyrstu mínútu sem Kjartan Sturluson í marki Vals varði vel. Kjartan var kominn aftur í mark Vals á kostnað Haraldar Björnssonar.

Valsmenn skoruðu hinsvegar úr sínu fyrsta færi og þar var Pétur Markan að verki. Eftir góða sókn Vals komst Pétur einn í gegn og skoraði örugglega framhjá Lasse Jörgensen í marki Keflavíkur. 

Keflvíkingar voru ekki lengi að jafna. Eftir slæm mistök í rangstöðuspili Vals komst Haukur Ingi Guðnason einn gegn Kjartani og gerði engin mistök og skoraði á nærhornið.  Ljóst var að stefndi í hörkuleik á Vodafonevellinum. Leikurinn var mjög opinn og skemmtilegur og mikill sóknarhugur í báðum liðum.

Á átjándu mínútu dró aftur til tíðinda. Helgi Sigurðsson var með knöttinn á teigboganum og var að leita eftir opnu skoti, loks lét Helgi bara vaða á markið, Lasse Jörgensen misreiknaði boltann í miklum vindi og inn fór knötturinn. Valsmenn því komnir yfir aftur og með yfirhöndina í leiknum.

Eftir þetta sóttu Keflvíkingar mjög og ógnuðu með góðum skotum sem gáfu af sér hornspyrnu sem gestirnir náðu þó ekki að nýta sem skildi. Undir lok fyrri hálfleiks áttu Helgi Sigurðsson og Baldur Aðalsteinsson báðir sláarskot.

Fyrri hálfleikur var einn sá skemmtilegasti sem blaðamaður hefur séð í sumar og gaman að sjá sóknartilburði beggja liða. Gestirnir byrjuðu sterkari í seinni hálfleik og voru líklegri til að skora. Guðmundur Steinarsson átti gott skot með vinstri úr markteig Vals en Kjartan Sturluson sýndi glæsileg tilþrif í markvörslunni.

Þegar áleið hálfleikinn jókst sóknarþungi Keflvíkinga og raun bara spurning hvenær þeir myndu jafna. Á sjötugustu mínútu kom Jóhann B. Guðmundsson inná hjá Keflavík, og það tók hann aðeins tvær mínútur að jafna fyrir sitt lið.

Eftir aukaspyrnu Keflavíkur tókst Valsmönnum ekki að hreinsa teiginn og boltinn barst til Jóhanns sem þrumaði boltanum í fjærhornið, gjörsamlega óverjandi fyrir Kjartan í markinu.  Eftir markið sóttu gestirnir mun meira án þess að skapa sér opið færi, það vantaði alltaf þessa síðustu sendingu til að opna teiginn vel.  Undir lokin var mikil spenna í leiknum og bæði lið leituðu eftir sigurmarkinu. Það kom bara ekki og niðurstaðan 2-2 í opnum og skemmtilegum leik.

 Valur-Keflavík   2-2

1-0, Pétur Markan 3´

1-1, Haukur Ingi Guðnason 5´

2-1, Helgi Sigurðsson 18´

2-2, Jóhann B. Guðmundsson. 70´.

 

Vodafonevöllurinn Hlíðarenda. Áhorfendur: 1342

Dómari: Kristinn Jakobsson 6 7

Skot (á mark): 13 (4)- 14(6)

Varið:  Kjartan 4- Lasse 6

Aukaspyrnur:  10-12

Horn: 7-8

Rangstöður:  6-4

Valur (4-4-2)

Kjartan Sturluson 7

Steinþór Gíslason 5

Reynir Leósson 6

Atli Sveinn Þórarinsson 6

Bjarni Ólafur Eiríksson 6

Baldur Ingimar Aðalsteinsson 6

(85., Arnar Sveinn Geirsson -)

Sigurbjörn Hreiðarsson 6

Ian Jeffs 7

Viktor Unnar Illugason 6

(60., Marel Baldvinsson 5)

Helgi Sigurðsson 6

Pétur Markan 7

 

Keflavík (4-4-2):

Lasse Jörgensen  6

Guðjón Árni Antoníusson 6

Bjarni Hólm Aðalsteinsson 6

Alen Sutej 6

Brynjar Guðmundsson 6

Magnús Sverrir Þorsteinsson 6

Jón Gunnar Eysteinsson 6

Hólmar Örn Rúnarsson 5

(70.,  Jóhann B. Guðmundsson 7)

Símun Eiler Samuelsen 8 - Maður leiksins

Haukur Ingi Guðnason 6

(20., Stefán Örn Arnarsson 5)

Guðmundur Steinarsson 7