Óli Stefán: Mikilvægt að önnur lið í deildinni átti sig á smithættunni

Grindvíkingurinn Óli Stefán Flóventsson hefur staðfest að hann hafi greinst með svínaflensuna en níu aðrir leikmenn liðsins eru mjög líklega einnig með sömu tegund af flensu.

„Ég fékk staðfestingu á þessu í hádeginu í dag og landlæknisembættið segir að menn eigi þá að vera í sóttkví í sjö daga á eftir. Ég steinlá á mánudeginum en læknarnir sögðu mér að ég hefði mjög líklega þegar verið orðinn smitberi á sunnudeginum þó svo að ég hafi ekki fundið mikið fyrir einkennunum þá.

Á mánudeginum fékk ég mikinn hita og höfuð -og beinverki og leið alveg djöfullega bara. Ég er samt allur að koma til núna og er orðinn hitalaus," segir Óli Stefán.

Óli Stefán segir mikilvægt að önnur lið í deildinni átti sig á því hversu fljótt veiran berist á milli manna og með hvaða hætti.

„Við vorum ekkert að spá í þetta þó svo að Zoran [Stamenic] hafi verið farinn að finna einkenni á laugardeginum og drukkum allir úr sömu vatnsbrúsum og annað slíkt.

Það er því mikilvægt núna að önnur lið í deildinni hafi varann á því þetta er bráðsmitandi andskoti," segir Óli Stefán en nánara viðtal birtist við hann í Fréttablaðinu á morgun.