West Ham kaupir svissneskann táning

Enska úrvalsdeildarfélagið West Ham hefur staðfest kaup á svissneska U-19 ára landsliðsmanninum Fabio Daprela frá Grasshopper.

Kaupverðið er ekki gefið upp en Daprela hefur skrifað undir fimm ára samning við West Ham.

Leikmaðurinn kvaðst hlakka mjög til þess að vinna undir knattspyrnustjóranum Gianfranco Zola og að Ítalinn hafi átt stóran þátt í því að hann valdi West Ham en mörg af stærstu liðum Ítalíu er sögð hafa verið á eftir leikmanninum.

„Ég er gríðarlega ánægður með að koma til West Ham þar sem ég hef fylgst með ensku úrvalsdeildinni í sjónvarpi í mörg ár. Ég tel líka að ég geti lært mikið af knattspyrnustjóranum Zola og leikmönnum á borð við Matthew Upson og Mark Noble," segir vinstri bakvörðurinn Daprela í viðtali á opinberri heimasíðu West Ham.