Matthías: Danry gaf mér viljandi olnbogaskot

Umdeilt atvik átti sér stað í leik FH og Þróttar í kvöld. Þegar sjö mínútur voru eftir af fyrri hálfleik féll FH-ingurinn Matthías Vilhjálmsson til jarðar á miðjum vellinum og fjarri boltanum.

FH-ingar urðu alveg brjálaðir og sökuðu Danann Dennis Danry um að hafa gefið Matthíasi olnbogaskot. Valgeir Valgeirsson dómari virtist ekki hafa séð atvikið. Sömu sögu var að segja af aðstoðardómurum hans því Valgeir aðhafðist ekkert.

„Já, hann gaf mér olnbogaskot og algjörlega að óþörfu," sagði Matthías Vilhjálmsson FH-ingur sem hristi olnbogaskotið af sér og spilaði vel.

Þjálfarar FH, Heimir Guðjónsson og Jörundur Áki Sveinsson, urðu æfir á bekknum og vildu sjá Danann fara í sturtu.

„Mér fannst þetta vera viljandi og klárt rautt spjald," sagði Heimir eftir leikinn.

„Við sáum þetta hérna á bekknum og vorum eðlilega ekki sáttir. Hann kom bara að óþörfu til Matthíasar og gaf honum olnbogaskot."