„Vítavert" vítavert í sölum Alþingis

Álfheiður Ingadóttir, fimmti varaforseti Alþingis, hvatti Tryggva Þór Herbertsson, þingmann Sjálfstæðisflokksins, tvisvar til að gæta hófs í orðavali fyrir að nota orðið vítavert í máli sínu í þingsal í gærkvöld.

Tryggvi ræddi um vinnubrögð í efnahags- og skattanefnd og sagði vítavert hvernig málið hefði verið rifið út úr nefndinni.

Kvað þá þingklukkan við og forseti hvatti þingmanninn í fullri vinsemd til að gæta orða sinna í ræðustól Alþingis. Tryggvi spurði þá forseta hvað hann hefði sagt sem kallaði á slík ummæli og fékk þá skýringu að það væri orðanotkunin „vítavert".

„Ég tel að þetta orð sé síst ofmælt miðað við málsferðina sem málið fékk," sagði þá Tryggvi.

Þegar hann reyndi strax að lýsa þeirri skoðun sinni aftur að vinnubrögð nefndarinnar hefðu verið vítaverð kvað þingklukkan við og forseti áminnti hann á ný.

Að svo búnu var ræðutíma Tryggva lokið og hann þurfti að yfirgefa ræðustól, en fékk svo loks að klára setninguna í þriðju tilraun er hann tók til máls á ný.

Tveir þingmenn Sjálfstæðisflokks, Guðlaugur Þór Þórðarson og Unnur Brá Konráðsdóttir, tóku til máls um fundarstjórn forseta og sögðu athugasemdir við orðaval ræðumanns koma sér á óvart.

Óskaði Unnur Brá eftir því að forseti upplýsti um þau orð sem ekki mætti nota í þinginu um kvöldið.

Upptöku af atvikinu má sjá hér.