Joorabchian: Tevez fékk ekki nægan tíma

Kia Joorabchian, maðurinn sem á samningsrétt Carlos Tevez, segir að Tevez hafi ákveðið að semja ekki við Manchester United þar sem að félagið hafi ekki gefið honum nægan tíma til að íhuga tilboð þeirra.

United tilkynnti í morgun að Tevez myndi fara frá félaginu eftir að hafa verið í tvö ár hjá United á lánssamningi.

United hafði samþykkt að greiða Joorabchain 25,5 milljónir punda fyrir Tevez en nú er búist við því að hann gangi annað hvort til liðs við Manchester City eða Chelsea.

„Þegar að United lagði fram tilboðið fyrir tíu dögum síðan var það í fyrsta sinn í tvö ár sem þeir buðu honum samning. Við fórum ekki fram á meiri pening heldur tíma til að íhuga tilboðið."

„Carlos var með fjölskyldu sína í huga þegar hann tók þessa ákvörðun. Við höfnuðum ekki tilboðinu, Manchester United ákvað að draga sig úr málinu."