Vigdís veitti verðlaun á degi íslenskrar tungu

Hátt í sjötíu grunnskólanemar í Reykjavík tóku við íslenskuverðlaunum  menntaráðs við hátíðlega athöfn í Tjarnarsal Ráðhúss Reykjavíkur í dag á degi íslenskrar tungu. Verndari verðlaunanna er frú Vigdís Finnbogadóttir, fyrrverandi forseti, en markmið þeirra er að auka áhuga grunnskólanema á móðurmálinu og hvetja þá til framfara í tjáningu talaðs máls og ritaðs.

Marta Guðjónsdóttir, formaður nefndar um íslenskuverðlaun menntaráðs, setti athöfnina en að því loknu hófst hátíðardagskrá með ávarpi Vigdísar, tónlistaratriðum grunnskólanema og samsöng, að fram kemur í tilkynningu.

Þar segir jafnframt að grunnskólanemarnir sem tóku við verðlaunum að þessu sinni hafi skarað fram úr á ýmsa vegu, í lestrarfærni, skapandi skrifum, ljóðasmíði og framsögn. Nokkrir þeirra eiga annað móðurmál en íslensku en hafa sýnt miklar framfarir í íslenskunámi og tjáningu.

Meðal verðlaunahafa eru fjórir drengir í Foldaskóla sem gerðu stuttmynd upp úr Hrafnkels sögu Freysgoða, ungir bókaormar og sagnameistarar. Allir fengu til eignar veglegan verðlaunagrip úr gleri sem hannaður er af Dröfn Guðmundsdóttur myndhöggvara.