Vilja baktryggja fyrirvara

Fjárlaganefnd fundaði tvisvar í gær um frumvarp um ríkisábyrgð vegna Icesave. Nefndin bauð gestum á annan fundinn, lögmönnunum Þórhalli H. Þorvaldssyni og Þorsteini Einarssyni, en þeir rituðu grein um málið í Morgunblaðið í gær.

Samkvæmt upplýsingum Fréttablaðsins er verið að skoða hvernig ganga þarf frá láninu sem trygginga­sjóður innstæðueiganda mun taka, verði málið samþykkt, með ábyrgð ríkisins. Sjóðurinn verður formlegur lántakandi, en Alþingi þarf að samþykkja ríkisábyrgðina til að samningurinn taki gildi.

Guðbjartur Hannesson, formaður fjárlaganefndar, segir nefndina vinna að því að tryggja að fyrirvarar Alþingis haldi. „Við erum að skoða hvað þarf til og hvernig. Þetta er spurning um samræmi á milli fyrirvaranna og ábyrgðar sem tryggingasjóðurinn þarf. Við erum að feta okkur í gegnum þetta.“

Samkvæmt heimildum blaðsins er ekki endilega reiknað með að Bretar og Hollendingar taki þá fyrir­vara til sérstakrar samþykktar. Samþykki þeir að greiða lánið, verði litið svo á að þeir hafi samþykkt skilmála Alþingis fyrir lántökunni.Þegar blaðið fór í prentun stóð seinni fundur fjárlaganefndar enn yfir.- kóp