Van Persie líklega áfram hjá Arsenal

Robin van Persie telur miklar líkur á því að hann verði áfram í herbúðum Arsenal og að hann muni framlengja samning sinn við félagið í sumar.

Van Persie hefur átt í viðræðum við forráðamenn félagsins í dágóðan tíma um framlengingu á samningnum en hann á nú fimmtán mánuði eftir af núverandi samningi.

„Við höfum átt tvo fundi í mjög jákvæðu andrúmslofti," sagði van Persie í samtali við Daily Mirror. „Báðir aðilar vilja semja og því tel ég miklar líkur á því að ég verði áfram."

Það er þó líklegt að beðið verði með þessi mál til loka tímabilsins og segir van Persie að honum liggi ekkert á.