Drogba framlengdi við Chelsea: Það geta allir skipt um skoðun

Didier Drogba er búinn að skrifa undir nýjan þriggja ára samning við Chelsea en það er ekki mjög langt síðan sem að það leit út fyrir að þessi 31 árs gamli landsliðsmaður Fílabeinsstrandarinnar væri á leiðinni í burtu af Brúnni.

„Auðvitað var ég að tala um það hér áður fyrr að ég vildi fara en það geta allir skipt um skoðun," sagði Drogba í viðtalið við Chelsea TV. „Þegar þú ert í ástarsambandi við lið, þá getur þú alltaf farið í fýlu en þú kemur alltaf aftur því þetta er þitt lið," sagði Drogba.

„Ég er búinn að vera hérna í fimm ár og ég elska að spila fyrir Chelsea. Ég ætla að halda áfram að vinna titla með Chelsea og ég hef metnað til að vinna aftur enska meistaratitilinn með liðinu," sagði Drogba en aðalatriðið að hans mati er þó að vinna Meistaradeildina í fyrsta sinn.

„Það er algjört forgangsmál hjá mér að vinna Meistaradeildina og ég er sannfærður um að við getum loksins lyft stóra bikarnum í vor," sagði Drogba en hann er búinn að skora 94 mörk í 216 leikjum með Chelsea en með félaginu hefur hann unnið tvo meistaratitla, tvo bikarmeistaratitla og tvo deildarmeistaratitla síðan að hann kom frá Marseille árið 2004.