Alfreð Finnbogason: Lykilleikur fyrir okkur

Blikinn Alfreð Finnbogason var skæður á Kópavogsvelli í kvöld. Síógnandi, sterkur á boltanum og skoraði svo eitt af mörkum sumarsins.

„Það hefur á stundum verið okkar akkilesarhæll að lenda undir og ná ekki að rífa okkur upp eftir það. Það gerðist sem betur fer ekki í kvöld. Þetta var algjör lykilleikur fyrir okkur og við urðum að vinna. Nú eru okkur allir vegir færir," sagði Alfreð ákveðinn og bætti við að Blikarnir ætluðu sér að vera í efri hlutanum í sumar.

„Mér fannst við vera sterkari. Við pössuðum að fá ekki mark á okkur snemma og þegar það gekk ekki hjá þeim að skora strax þá urðu þeir svolítið ráðalausir," sagði Alfreð sem fannst afar gaman að leggja gamla félaga í Stjörnuliðinu.

„Það eru nokkrir Blikar í þessu Stjörnuliði sem ætluðu að vera með einhverja stæla í dag en þeir voru bara stoppaðir," sagði Alfreð og brosti breitt.