Dagar málaliðaforingjans Simon Mann brátt taldir

Dagar breska málaliðaforingjans Simon Mann gætu verið taldir. Hæstiréttur Zimbabwe hefur úrskurðað að Mann verði framseldur til Miðbaugs-Gíneu en þar bíður hans dauðadómur fyrir misheppnað valdarán árið 2004

Sagan öll er eins og hún hafi verið skrifuð af spennusagnahöfundinum Frederick Forsythe. Simon Mann er af aðalsættum, menntaður í Eaton og á að baki feril með bresku sérsveitunum. Hann fór fyrir hópi málaliða í átt til Miðbaugs-Gíenu og var ætlunin að steypa einræðisherra þess lands með vopnavaldi.

Flutningavél með hópinn millilenti í Zimbabwe á leiðinni og þar var hópurinn, um 60 manns handtekinn sem og hald lagt á töluvert af hergögnum.

Inn í málið flækist svo Mark Thatcher, sonur Margretar Thachers fyrrum forsætisráðherra Bretlands. Mark var ákærður fyrir aðild að valdráninu og að hafa verið annar af þeim sem fjármögnuðu valdaránstilraunina. Hann var dæmdur í sekt og skilorðbundið fangelsi í Suður-Afríku árið 2005.

Einræðisherrann sem stjórnar Miðbaugs-Gíneu er Teodoro Nguema og sá hefur sagt að Mann bíði dauðadómur í landinu. Teodoro þykir með harðsvírustu einræðisherrum Afríku og hefur orð á sér fyrir að éta hold af myrtum andstæðingum sínum.