„Já, það er rétt, ég var staddur í kirkjunni við æfingar með stúlknakórnum í þau skipti sem sóknarpresturinn, séra Gunnar Björnsson, leitaði á þær og olli það þeim miklu uppnámi, " segir Jörg Sondermann, organisti við Selfosskirkju, í samtali við Vísi.

Jörg segist ekki hafa séð með eigin augum hvað gerðist en í báðum tilfellum þurftu stúlkurnar að skreppa á salernið en leiðin að salerninu liggur framhjá skrifstofu séra Gunnars í kirkjunn.

„Stúlkan kom ekki til baka fyrr en eftir góða stund og var þá í miklu uppnámi. Eftir því sem ég komst næst hafði presturinn kallað stúlkuna, sem þá var um sextán ára gömul, inn á skrifstofu sína og látið vel að henni. En frásögn hennar var ekki í nákvæmu samhengi en eitthvað á þá leið að séra Gunnar hafi tekið utan um hana og kysst hana. Henni var mjög brugðið og óskaði eftir að fá að yfirgefa kirkjuna strax og fara heim," segir Jörg.

Hitt atvikið gerðist nokkru síðar með mjög svipuðum hætti en Jörg ítrekar að hann hafi heldur ekki orðið vitni að samskiptum prestsins og þeirrar stúlku. Hins vegar hafi hann getað ráðið af viðbrögðum hennar að eitthvað ónotalegt hefði átt sér stað milli stúlkunnar og prestsins. „Viðbrögð beggja stúlknanna voru mjög á svipaða lund og þær treystu sér ekki til að halda áfram á æfingunni og flýttu sér heim til foreldra sinna," segir Jörg.

Hann segist þekkja foreldra stúlknanna mjög vel og þegar þeir leituðu til hans með aðstoð við kæru á hendur séra Gunnari hafi hann sem kórstjóri og ábyrgðarmaður stúlknanna brugðist við á þann eina hátt sem hann taldi réttan. „Ég hét þeim stuðningi mínum í þessu máli eins og samviska mín bauð auk þess sem ég taldi það skyldu mína sem kórstjóra að standa þeim við hlið og styðja í þessu erfiða máli. En ég tek það skýrt fram að ég veit ekki með fullri vissu hvað nákvæmlega gerðist annað en lesa mátti út úr við brögðum beggja stúlknanna og slitróttri frásögn þeirra," segir Jörg enn fremur.

Jörg hóf störf við Selfosskirkju fyrir tveimur árum en hafði áður verið við vinnu í Hveragerði. Sóknarnefndin réð Jörg til starfa þegar séra Gunnar var fjarri í fríi og mun sóknarpresturinn því ekki hafa verið spyrður álits á nýja organistanum sem er fyrst og fremst píanóleikari og er Þjóðverji.

Hann neitar því að honum gangi það eitt til að ná sér niður á séra Gunnari með stuðningi við stúlkurnar en játar að hann og séra Gunnar hafi ekki alltaf verið sammála um það í kirkjustarfinu sem sneri að tónlistinni.

„Séra Gunnar er mjög klár maður og sjálfur mikill músíkant. Hann hafði sínar skoðanir sem stundum voru á svig við mínar. En það er bara eins og gengur og ég kannast ekki við að á milli okkar Gunnars ríki annað en virðing fyrir störfum hvor annars. Ég hef frá upphafi unnað við margt gott í fari prestsins en hann er einstaklega kurteis og velviljaður maður," segir Jörg Sondermann, organisti og kórstjóri Selfosskirkju.