Hargreaves til sérfræðings

Enski landsliðsmaðurinn Owen Hargreaves hjá Manchester United er farinn til Bandaríkjanna þar sem hann hittir fyrir læknirinn Richard Steadman.

Steadman þessi hefur unnið með mönnum eins og Michael Owen og Ruud van Nistelrooy og fær það hlutverk að reyna að hressa upp á hnéð á Hargreaves sem hefur gert honum lífið leitt að undanförnu.

Miðjumaðurinn hefur aðeins spilað 37 leiki fyrir United síðan hann gekk í raðir félagsins frá Bayern fyrir 18 milljónir punda í júlí í fyrra.

Hargreaves er þegar búinn að fara til sérfræðinga í Svíþjóð og Lundúnum, en nú er hann staddur í Colorado í Bandaríkjunum þar sem hann hittir Steadman lækni.