Segja póstræningja hafa haft 175 milljónir upp úr krafsinu

Tíu grímuklæddir menn sem rændu póstflokkunarstöð í Gautaborg í síðustu viku höfðu á brott með sér 17,5 milljónir sænskra króna, jafnvirði um 175 milljóna íslenskra króna. Frá þessu greinir sænska blaðið GT Expressen.

Ránið vakti mikla athygli en einstaklega bíræfið. Mennirnir ruddust inn á flokkunarstöðuna og ógnuðu starfsfólki og höfðu á brott með sér fjármuni. Áður en mennirnir lögðu á flótta kveiktu þeir í bílum nærri póstmiðstöðinni og dreifðu nöglum um allar götur. Fimm grunsamlegir pakkar fundust á sama tíma víða um borgina - meðal annars fyrir utan miðstöð lögreglu. Var það til að tefja lögreglu.

Ekki lá fyrir hversu miklu var stolið en nú segir GT Expressen að ræningjarnir hafi haft 175 milljónir í evruseðlum upp úr krafsinu.

Þrír menn hafa verið handteknir vegna málsins. Sænskir miðlar greina frá því að margt bendi til þess að fáir hafi komið að skipulagningu ránsins en að þeir hafi svo útvegað menn til aðgerðanna. Menn hafi fengið ólík hlutverk í ráninu og enginn af þeim hafi vitað um hlutverk annarra í því.