Meirihluti stjórnmálamanna í Kaupmannahöfn gegn vændi

Meirihluti stjórnmálamanna í Kaupmannahöfn vill nú að vændi verði gert ólöglegt í Danmörku.

Greint er frá þessu í fríblaðinu metroXpress í dag. Vandamál tengdu vændi fara nú vaxandi í Kaupmannahöfn og víðar í landinu þar sem vændiskonum hefur fjölgað ört á síðustu árum einkum erlendum vændiskonum.

Er nú talið að um helmingur þeirra kvenna sem leggja stund á vændi í Danmörku séu af erlendum uppruna og koma þær einkum frá Austur-Evrópu. Talið er að fjöldi af erlendu vændiskonunum sé seldur mansali til Danmerkur og þær neyddar til að selja sig.

Meirihluti þingmanna Kaupmannahafnar hefur hvatt ríkisstjórn Anders Fogh Rasmussen til að taka á þessu vandamáli og setja lög sem banna vændi. Talsmaður Jafnaðarmannaflokksins, Anne Vang, segir í samtali við metroXpress að þörf sé á nýrri löggjöf um vændi núna vegna þess mikla fjölda kvenna sem eru nú neyddar til að stunda þessa iðju í Danmörku.

Segir Vang að þetta hafi yfirleitt í för með sér hörmulegar afleiðingar fyrir viðkomandi konur. Fyrir utan löggjöfina vilja þingmennirnar einnig að herferð sé sett í gang þar sem karlmenn séu hvattir til að nýta sér ekki þjónustu vændiskvenna.