Jacobsen á leið til Everton

Danski varnarmaðurinn Lars Christian Jacobsen er á leið til enska úrvalsdeildarfélagsins Everton frá Nürnberg í Þýskalandi.

Jacobsen fer til Everton án greiðslu og hefur samþykkt að skrifa undir eins árs samning við félagið en þarf fyrst að standast læknisskoðun.

David Moyes, stjóri Everton, hefur átt við meiðslavandræði að stríða í sínum leikmannahópi og gengið illa að fá leikmenn til félagsins. Til að mynda náði Everton samkomulagi við Juventus að fá Tiago að láni en Portúgalinn hafnaði því.

Þá er Tony Hibbert frá næstu sex vikurnar eftir að hafa gengist undir uppskurð á hné. Búist er við að Jacobsen verði formlega kynntur til sögunnar sem nýr leikmaður Everton á fimmtudaginn.