Ferguson vill vinna fleiri Evróputitla

Sir Alex Ferguson segir að hans menn í Manchester United hafi alla burði til að verja titil sinn í Meistaradeildinni, því liðið geti bætt sig á næsta ári.

"Það er ekki auðvelt að verja Evróputitil en mér finnst þetta lið vera nógu gott til þess. Ég held að liðið eigi eftir að verða betra á næsta tímabili," sagði Ferguson.

Hann hrósaði sínum mönnum í hástert eftir sigurinn í gær. "Þetta var frábært. Þetta var fyrsti sigur minn í vítakeppni fyrir utan góðgerðarskjöldinn. Ég tapaði þremur með Aberdeen og þremur með United, svo segja má að sjö hafi verið happatalan mín," sagði Ferguson.

Hann heiðraði minningu Busby-drengjanna, en fimm af eftirlifandi leikmönnum gamla United liðsins voru á vellinum í gær, þar á meðal Bobby Charlton.

"Við vildum vinna til að heiðra minningu þeirra og það er erfitt að spila á móti liði með slík áform. Ég held að örlögin hafi spilað þarna inn í og ég er mjög stoltur af þessu afreki," sagði Ferguson.