Tveir í haldi vegna morðsins á Bhutto

Pakistanska lögreglan hefur handtekið tvo menn sem hún segir „mjög þýðingarmikla meinta hryðjuverkamenn" í tengslum við morðið á Benazir Bhutto stjórnarandstöðuleiðtoga. Tilkynning embættismanna í öryggismálum kemur á sama tima og 40 daga sorgartímabili lýkur í Pakistan vegna fráfalls Bhutto. Auk þess snúa nú tveir rannsóknarlögreglumenn Scotland Yard til Pakistan á ný til að hjálpa til við rannsókn morðsins.

Í síðasta mánuði handtóku yfirvöld Aitezaz Shsh, 15 ára gamlan dreng sem viðurkenndi að hafa verið varasjálfsmorðssprengjuaðili fyrir hópinn sem var valdur að dauða Bhutto.

Shah og „umboðsmaður" hans Sher Zaman voru handteknir í borginni Dera Ismail Khan í norðvesturhluta landsins.

Stjórnin hefur ásakað hinn al-kaída-tengda herforingja Baitullah Mehsud um að skipuleggja morðið.

Bhutto lést í sprengjuárás í borginni Rawalpindi 27. desember síðastliðinn þar sem hún stóð í bíl sem keyrt var í gegnum mannþröng.

Innanríkisráðuneytið sagði að hún hefði dáið af áverkum á höfði þegar sjálfsmorðssprengja sprakk við bíl hennar. Stuðningsmenn hennar sem voru hjá henni þegar hún lést halda því hins vegar fram að hún hafi látist af byssuskoti í höfuðið. Deilan um dánarorsök hennar varð til þess að yfirvöld í Pakistan óskuðu eftir aðstoð Scotland Yard.