Krónan ekki veikari í fjölda ára

Krónan hélt áfram að veikjast í dag og hefur hún ekki verið veikari í yfir sex ár. Verðhækkanir hellast yfir landsmenn með vorinu að óbreyttu.

Gengi krónunnar hefur verið á fleygiferð alla vikuna. Krónan hefur veikst býsna hratt og hélt því áfram í dag en þá féll gengi hennar um 1,6%. Frá áramótum hefur gengið veikst um hátt í 17%. Evran er nú um 111 krónur og bandaríkjadalurinn um 71 króna.

Jón Bjarki Bentsson hagfræðingur hjá Greiningardeild Glitnis segir þess ekki lengi að bíða neytendur finni fyrir áhrifum veikingar krónunnar í hærra vöruverði ef hún styrkist ekki aftur. Veiking krónunnar sé þegar farin að skila sér í verðbólgu og vöruverð hækki töluvert á innfluttum vörum með vorinu að óbreyttu. Ríflega þriðjungur af neyslu Íslendinga eru innfluttar vörur.