Tveir aðilar mjög spenntir fyrir Newcastle

Greint var frá því í dag að tveir aðilar væru mjög spenntir fyrir því að kaupa enska úrvalsdeildarfélagið Newcastle af Mike Ashley.

Þetta sagði Keith Harris, stjórnarmaður í fjárfestingarbankanum Seymour Price sem hefur annast söluna fyrir hönd Ashley.

„Það eru tveir aðilar sem eru að íhuga alvarlega að kaupa félagið," sagði Harris sem vildi þó ekki nefna þá á nafn. Hann sagði þó að gengið yrði frá sölunni fyrir áramót eða snemma á næsta ári.

Ashley setti félagið á sölu í september, skömmu eftir að Kevin Keegan hætti hjá félaginu. Stuðningsmenn mótmæltu stjórnunarstíl Ashley mikið í kjölfarið á því.