Ekki útlit fyrir að Landsbanki og Glitnir hafi afskrifað skuldir starfsmanna

Björgvin G. Sigurðsson viðskiptaráðherra segir að fyrstu upplýsingar bendi ekki til þess að Landsbankinn og Glitnir hafi afskrifað skuldir starfsmanna vegna hlutabréfakaupa líkt og stjórnendur Kaupþings létu gera skömmu fyrir fall bankans.

Björgvin ræddi við fréttamenn eftir ríkisstjórnarfund í Ráðherrabústaðnum í morgun um fregnir af málum Kaupþings. Fram kom í fréttum Stöðvar 2 í gær að skuldir æðstu stjórnenda Kaupþings vegna hlutabréfakaupa í bankanum hefðu verið afskrifaðar skömmu fyrir þjóðnýtingu bankans. Upphæðin sem um ræddi væri um fimmtíu milljarðar króna.

Björgvin sagði að Fjármálaeftirlitið rannsakaði málið og að það væri óþolandi fyrir almenning að fá fréttir sem þessar. Allir ættu að sitja við sama borð hjá bönkunum. Hann sagði að afskriftirnar gætu gengið til baka ef óeðlilega hefði verið staðið að málum en hann ætlaði ekki að gerast dómari í málinu. Björgvin sagðist hafa kynnt sér málin lítillega í gær og upplýsingar sínar bentu ekki til þess að sama hefði verið uppi á tengnum hjá hinum föllnu bönkunum, Glitni og Landsbanka.

Hann sagði enn fremur ekkert hafa þokast í deilunni við Breta en taldi gott ef Norðmenn gætu tekið að sér hlutverk sáttasemjara í málinu. Enn fremur sagði hann að töfin á afgreiðslu á láni Alþjóðagjaldeyrissjóðsins tengdist ekki deilunni við Breta.