Hert lyfjaeftirlit í úrvalsdeildinni

Til stendur að herða lyfjaeftirlit til muna í ensku úrvalsdeildinni frá og með næsta ári þegar hópur leikmanna í deildinni mun gangast undir ströng próf með óreglulegu millibili.

Eins og staðan er í dag er aðeins einn leikmaður úr hvoru liði sendur í lyfjapróf eftir leiki, en það er ekki nálægt því stranga eftirliti sem tekið hefur verið upp í mörgum öðrum íþróttagreinum samkvæmt stöðlum Alþjóða lyfjaeftirlitsins.

Þessi nýja ráðstöfun verður framkvæmd í samráði við leikmannasamtökin á Englandi og fer eftir nýjum reglum lyfjaeftirlitsins sem taka gildi um áramótin.

Þetta átak mun fara í gang í úrvalsdeildinni í júlí á næsta ári, en þá verður fylgst mjög náið með þrjátíu leikmönnum úr deildinni. Þeim verður gert að gera nákvæmlega grein fyrir ferðum sínum og geta átt von á að fara í lyfjapróf fyrirvaralaust.

Ekki hefur verið gefið upp hvaða leikmenn þetta verða eða hvernig þeir veða valdir.

Enskir knattspyrnumenn hafa átt það til að rata á síður blaðanna vegna lyfjamála undanfarin ár.

Rio Ferdinand hjá Manchester United fékk átta mánaða keppnisbann árið 2003 þegar hann skrópaði í lyfjapróf hjá félaginu.

Sama ár féll markvörðurinn Mark Bosnich á lyfjaprófi hjá Chelsea eftir að hafa notað kókaín og ári síðar gerðist annar Chelsea-maður, Adrian Mutu, sekur um sama brot. Báðir voru reknir frá félaginu.

Lyfjapróf utan keppni voru fyrst tekin upp í frjálsum íþróttum árið 1989. Það var árið eftir að kanadíski spretthlauparinn Ben Johnson féll á lyfjaprófi eftir að hafa sett heimsmet í 100 metra hlaupi á ÓL í Seúl.