Gerrard og Keane í fríi á morgun

Rafa Benítez, knattspyrnustjóri Liverpool, ætlar að hvíla þá Steven Gerrard og Robbie Keane þegar liðið mætir Tottenham í enska deildabikarnum á miðvikudagskvöld.

Benítez vill hafa þá félaga ferska þegar Liverpool mætir Bolton í ensku úrvalsdeildinni um næstu helgi.

Talið er að Jose Reina, Javier Mascherano, Daniel Agger og Albert Riera gætu einnig verið hvíldir.

Ekki er ólíklegt að Benítez leyfi Sami Hyypia, Jermaine Pennant, Lucas, Nabil El Zhar, David Ngog og Damien Plessis að fá tækifæri til að sýna sig og sanna.

„Það er alltaf erfitt að spila svona marga leiki í röð og það er eitthvað sem þarf að huga að. Sumir þessara leikmanna hafa einnig verið að ferðast í landsleiki. Í þessum leik gegn Tottenham munum við nota leikmenn sem hafa ekki spilað alla leiki," sagði Benítez.

Reiknað er með að Fernando Torres verði í byrjunarliðinu á morgun en spænski markahrókurinn þarf að koma sér í leikform eftir að hafa verið á meiðslalistanum í fimm vikur.