Spikaður Gillz í kynþokkafyllsta myndbandi sögunnar

„Ég hef aldrei verið feitari, 95 kíló með sjö prósent fitu," segi Egill Gillzenegger Einarsson. „Mér líður eins og offitusjúklingi". Það er að sögn Gillz nágranni hans sem ber sökina.

„Gylfi nágranni minn er feitasti fasteignasali á Íslandi. Það er eins og að koma inn í Nóa Síríus að koma heim til hans." segir vöðvatröllið, og bætir því við að ómögulegt sé að heimsækja fasteignasalann án þess að úða í sig nammi. „Ég er að spá í að flytja. Ég er að spila ber að ofan allar helgar, og get ekki verið feitur."

„Spikið" hefur þó ekki skemmt mikið fyrir Gillz annað en geðheilsuna. Merzedes Club hefur undanfarið unnið að myndbandi við nýjasta lag sitt, Meira frelsi, og lofar Egill einu kynþokkafyllsta myndbandi sögunnar. „Það á eftir að líða yfir fólk," segir Gillz, en myndbandið skartar fimmtán stúlkum í níðþröngum æfingafötum, ásamt fáklæddum Merzedes-mönnum í æfingasal. „Það er ekki hægt að gefa mikið frá sér en ég garantera good shit,"

Hann segir svo annað lag væntanlegt fljótlega eftir helgi, og það verði vægast sagt rosalegt. „Líklega eitt besta danslag allra tíma."