Bíða eftir því að FARC láti Betancourt lausa

Flugvél og læknar eru í viðbragðsstöðu ákveði FARC-skæruliðar að láta fransk-kólumbíska forsetaframbjóðandann Ingrid Betancourt lausa úr sex ára gíslingu. Hún er sögð alvarlega veik. Eiginmaður óttast að hún sé við dauðans dyr eða jafnvel látin.

FARC-skæruliðahreyfingin aðhyllist marxíska hugmyndafræði og er samtökunum enn stjórnað af þeim sem stofnaði þau árið 1964. Stjórnvöld í Kólumbíu hafa háð harða baráttu við hana síðan þá.

Betancourt er fransk-kólumbísk og var í framboði til forseta Kólumbíu þegar henni og aðstoðarkonu hennar, Clöru Rojas, var rænt í febrúar 2002. Þær voru þá á kosningaferðalagi um landið.

Myndir sýna að Betancourt er ekki við góða heilsu. Hún er sögð vera með lifrarbólgu B og húðsjúkdómi. Rojas og níu aðrir gíslar voru látnir lausir í janúar fyrir milligöngu Hugo Chavez, forseta Venesúela. Ekkert varð af frekari viðræðum þegar stjórnvöld í Kólumbíu gerður loftárásir á bækistöðvar FARC skæruliða í Ekvador án þess að ráðfæra sig við ráðamenn Quito. Ekvadorar og Venesúelamenn urðu æfareiðir en sættir tókust áður en til átaka kom.

Alþjóðasamfélagið hefur krafist þess að Betancourt - sem og aðrir gíslar - verði þegar látnir lausir. Alvaro Uribe, forseti Kólumbíu, skrifaði um helgina undir fyrirmæli um að hundrað FARC-skæruliðar skyldu látnir lausir gegn því að Betancourt og öðrum yrði sleppt.

FARC-liðar hafa enn ekki svarað tilboðinu. Frönsk flugvél er tilbúin ef grænt ljós er gefið á að sækja Betancourt og læknar í viðbragðsstöðu. Juan Carlos Lecopmt, eiginmaður Betancourt, óttast að eitthvað farið úrskeiðis. Hann er hræddur um að kona sé við dauðans dyr eða jafnvel að hún sé látin og skæruliðarnir vilji ekki upplýsa um það.