Franskur raðmorðingi þegir í réttarsalnum

Frakkinn Michel Fourniret, sem grunaður er um að hafa myrt og misnotað sjö stúlkur og konur í Frakklandi og Belgíu á árunum 1987 - 2003, neitaði að tjá sig um málið við dómara í dag yrði réttarsalurinn ekki ruddur. Eiginkona Fournirets er ákærð í sama máli fyrir vitorð við fimm morðanna. Málið er eitt stærsta raðmorðmál sem komið hefur inn á borð franskra yfirvalda og hefur vakið verðskuldaða athygli þar í landi. Meðal annars hefur Fourniret verið líkt við hinn belgíska Marc Dutroux sem hlaut lífstíðardóm árið 2004 fyrir kynferðisbrot gegn börnum. Þegar dómari bað Fourniret að greina frá nafni sínu við upphaf réttarhaldanna hélt sakborningurinn á lofti miða sem á var ritað: „Ég segi ekki orð nema réttarhöldin verði fyrir luktum dyrum."

Enn fremur afhenti Fourniret dómaranum skjal bundið í rauðan borða sem hann kvað vera skilaboð til fjölskyldna fórnarlamba hans og fór þess á leit að dómarinn læsi skjalið. Dómarinn varð hvorki við þeirri beiðni né beiðni Fournirets um lokað réttarhald. Þá hefur Fourniret látið uppi að hann óski ekki eftir þjónustu verjandans Pierre Blocquaux og tveggja annarra verjenda sem honum hafa verið útnefndir. Faðir 12 ára stúlku sem var meðal fórnarlamba Fournirets segir fjölskylduna ekki kæra sig um neinar útlistanir Fournirets á ódæðum hans. CNN greindi frá þessu.