Veitti sprautunálaræningjanum eftirför eftir ránið

Ungur Íslendingur sem staddur er hér á landi í páskafríi varð vitni að sprautunálarráninu á Select stöðinni í morgun. Hann veitti ræningjanum eftirför og gaf síðan lögreglu skýrslu. Hann segir að ræninginn hafi verið einn á ferð.

„Það stendur þarna náungi inni á bensínstöðinni frekar dópistalegur," segir maðurinn, sem vill ekki láta nafns síns getið, í samtali við Vísi. „Ég var búinn að taka eftir honum vera að væflast þarna inni í smástund. Síðan gengur hann aftur fyrir kassann og umlar eitthvað sem ég heyrði ekki við afgreiðslufólkið." Hann segir manninn hafa verið með íþróttatösku sem hann hafi stungið peningunum ofan í. Síðan hlóp hann út.

„Þegar ég áttaði mig á hvað hafði gerst bað ég strák sem var þarna með GSM síma að hringja á lögregluna. Síðan kippti ég í annan strák sem var þarna og bað hann um að koma með mér." Þeir fóru síðan í humátt á eftir manninum og sáu hann fara í átt að blokk við Æsufell. „Hann hvarf fyrir horn og þegar ég kom fyrir hornið var hann horfinn. En útihurðinn á einum stigaganginum var opin og ég held að hann hljóti að hafa farið þangað," segir maðurinn sem að þessu loknu fór og gaf lögreglu skýrslu. „Ég sagði þeim hvernig þetta hafði gerst og lýsti náunganum fyrir þeim, en ég sá bara þennan eina mann og held að þeir hafi ekki verið fleiri," segir hann en þrír eru nú í haldi vegna málsins.

„Þetta var smá ævintýri," segir hann en hann er staddur hér á landi í heimsókn en hann býr í Kaupmannahöfn. „Maður þarf greinilega að koma til Reykjavíkur til að lenda í svona, þetta gerist ekki í Köben að minnsta kosti."