Ekki enn samkomulag um eldflaugavarnakerfi

Rússar hafa ekki náð samkomulagi við Bandaríkjamenn varðandi eldflaugavarnarkerfi þeirra síðarnefndu í Austur-Evrópu.

Þá hafa þjóðirnar heldur ekki náð nýju samkomulagi um takmörkun á úrbreiðslu kjarnavopna. Þetta sagði Sergei Lavrov, utanríkisráðherra Rússlands, eftir viðræður við Condoleezzu Rice, bandaríska starfssystur sína, og Robert Gates, varnarmálaráðherra Bandaríkjanna.

Stjórnvöld í Bandaríkjunum höfðu óskað eftir viðræðum um málin en Rússar hafa verið andvígir því að Bandaríkjamenn komi upp eldflaugavarnakerfi í Tékklandi og Póllandi sem Bandaríkin segja vörn gegn árásum óvinaríkja eins og Írans og Norður-Kóreu.

Þá hafa ríkin ekki náð samkomulagi um framhald svokallaðs START-samnings um kjarnavopn en hann rennur út á næsta ári.