Vélsleðamenn hvattir til að fara varlega um páskana

Það sem af er þessu ári hafa 35 vélsleðaslys orðið hér á landi og eru þau alls 385 síðustu tíu ár. Þetta kemur fram í samantekt Sjóvar Forvarnahúss sem hvetur ökumenn vélsleða til þess að fara varlega nú um páskana. Bent er á að nú séu kjöraðstæður til að nota þessi tæki en því miður verði oft slys og óhöpp sem koma hefði mátt fyrir.

Mikil aukning hefur orðið á vélsleðaeign landsmanna að undanförnu og samkvæmt tjónaskýrslum Sjóvár verða flest óhöppin á vélsleðum við það að aka á jarðfasta hluti eins og grjót og íshellur. Flest og alvarlegustu slysin á vélsleðamönnum verða hins vegar þegar ekið er fram af hengju og þá oft í slæmu skyggni og oft er ekið of hratt miðað við aðstæður. Vélsleðamenn eru hvattir til að fara sér hægar þegar skyggni er takmarkað og aka í samræmi við það.

Sjóvá vísar í tölur lögreglunnar sem sýna að frá árinu 2000 hafi sex manns látist í vélsleðaslysum og síðustu tíu ár hafa 385 einstaklingar slasast. Á sama tímabili voru skráð tæp 800 óhöpp á vélsleðum eða að meðaltali um 80 óhöpp á ári. Flest óhöppin verða milli kl. 14 og 17 og algengasti hópurinn sem lendir í óhappi á vélsleðum er aldurinn 21-35 ára.

Þá eru vélsleðamenn hvattir til að undirbúa ferðir vel og láta alltaf vita hvert förinni er heitið, hvenær ráðgert er að koma til baka og ef einhverjar breytingar verða á ferðaáætluninni. Ef veður breytist skyndilega sé mikilvægt að halda hópinn og stoppa reglulega til að kanna hvort allir séu með. Verði einhver viðskila sé best að halda kyrru fyrir og jafnvel grafa sig í fönn.

Sjóvá bendir enn fremur á að sömu reglur gilda um tryggingar á bílum og vélsleðum, það er skylt er að hafa þá skráða og tryggða.