ESB hvetur til stillingar í Kosovo

Framkvæmdastjórn Evrópusambandið hvatti til stillingar í norðurhluta Kosovo þar sem ráðist var gegn hermönnum NATO og lögreglumönnum Sameinuðu þjóðanna sem þar eiga að gæta öryggis.

Skotið var á hermennina og lögreglumennina í borginni Mitrovica og slösuðust að minnsta kosti 22 lögreglumenn og tveir hermenn í átökunum. Þau tengjast því að um hundrað Serbar, sem lagt höfðu undir sig dómsal í borginni fyrir helgi, voru handteknir í dag og var gerður aðsúgur að bílalest Sameinuðu þjóðanna sem flutti þá á brott. Hermennirnir notuðu táragas í baráttu sinni við mótmælendurna sem beittu skotvopnum, steinum og bensínsprengjum.

Talsmaður framkvæmdastjórnar Evrópusambandsins sagði menn þar á bæ hafa miklar áhyggjur af ástandinu og sagði óviðunandi að ofbeldi væri beitt gegn starfsmönnum Sameinuðu þjóðanna og NATO. Kallaði hann eftir samvinnu allra aðila um uppbyggingu sjálfstæðs Kosovo-héraðs en það er einmitt sjálfstæðisyfirlýsing Kosovo-Albana í síðasta mánuði sem vakið hefur reiði Serba í héraðinu.