Biðröð eftir notuðum hlutum

Starfsfólk Góða hirðisins sér engin merki þess að farið sé að kreppa að í þjóðfélaginu enda berst þangað á hverjum degi mikið af veglegum hlutum. Viðskiptavinirnir bíða í röðum þegar verslunin er opnuð í von um að finna eitthvað einstakt.

Nokkur hópur hafði safnast fyrir utan Góða hirðinn, sem er í Fellsmúlanum í Reykjavík, rétt fyrir hádegi í gær þegar fréttastofu bar að garði. Anna Kristín Jakobsdóttir, verslunarstjóri Góða hirðisins, segir á milli fimmtíu og sextíu manns bíða fyrir utan verslunina í hvert sinn sem hún er opnuð.

Hlutirnir sem seldur eru í versluninni koma úr nytjagámum á endurvinnslustöðvum Sorpu en ágóðinn af sölunni rennur til góðgerðarmála. Starfsfólk Góða hirðisins segir mikið af veglegum hlutum berast þangað á hverjum degi. Þar má finna sjónvörp, húsgögn og jafnvel einstaka fótanuddtæki sem eru nokkuð vinsæl.