Ráðherra hrakti stjórnendur spítalans úr starfi

Heilbrigðisráðherra hrakti lykilstjórnendur Landspítalans úr starfi til að koma einkavæðingaráformum sínum í framkvæmd. Þetta kemur fram í ályktun þingflokks vinstri grænna. Ráðherra hefur sýnt óeðlileg vinnubrögð og ljóta framkomu gagnvart virtum embættismanni að mati Valgerðar Sverrisdóttur.

Samkvæmt tilkynningu sem heilbrigðisráðuneytið sendi frá sér í gær mun Magnús Pétursson, forstjóri Landspítalans Háskólasjúkrahúss, láta af störfum um næstu mánaðamót. Þá mun Jóhannes M. Gunnarsson, lækningaforstjóri, hætta í sínu starfi og taki við yfirumsjón með tilteknum þáttum vegna byggingar nýs spítala.

Fram kemur í tilkynningu frá ráðuneytinu að þetta hafi verið gert með samkomulagi allra aðila.

Samkvæmt heimildum fréttastofu létu þeir þó ekki af störfum af eigin ósk.

Í harðorða yfirlýsingu sem þingflokkur vinstri grænna sendi frá sér í morgun er Guðlaugur Þór Þórðarson, heilbrigðisráðherra, sagður hafa hrakið stjórnendurnar úr starfi til ýta einkavæðingaráformum sínum í framkvæmd.

Lýst er yfir þungum áhyggjum af ástandinu í heilbrigðiskerfinu og að þar ríki nú upplausn.

Undir þetta tekur Valgerður Sverrisdóttir. "Skipstjórinn í brúnni er hrakinn frá og það virðist meira og minna að fyrirtækið eigi að vera stjórnlaust næstu mánuðina. þetta er langstærsti vinnustaður á Íslandi og staður sem þjónar Íslendingum frá vöggu til grafar. Þetta er mjög alvarlegt mál."

Valgerður segir ljóst að þetta sé liður einkvæðingaráformum ráðherrans og gagnrýnir vinnubrögð hans.